Presidenti i Shteteve të Bashkuara, Donald Trump, ka deklaruar se është shumë pranë arritjes së një marrëveshjeje me Iranin dhe se kjo ishte një nga arsyet që e shtyu të kërkonte nga Izraeli ndalimin e sulmeve ndaj Teheranit. Në një intervistë për BBC, Trump tregoi se gjatë bisedës me kryeministrin izraelit Benjamin Netanyahu i kishte kërkuar të vepronte me “gjykim” dhe “logjikë të shëndoshë”, duke theksuar se palët janë afër nënshkrimit të një marrëveshjeje që, sipas tij, do të garantonte që Irani të mos zotërojë armë bërthamore. “E vetmja gjë që thashë ishte: ‘Duhet të përdorim gjykimin’. Jemi shumë afër nënshkrimit të një marrëveshjeje shumë të fortë, një marrëveshjeje shumë të mirë. As armë bërthamore, asgjë”, u shpreh Trump. I pyetur lidhur me sulmet izraelite që u kryen pavarësisht thirrjeve të tij për përmbajtje, presidenti amerikan tha se operacionet kishin nisur tashmë dhe nuk mund të ndaleshin në atë moment. Duke komentuar marrëdhënien me Netanyahun, Trump bëri një deklaratë të fortë, duke thënë: “Nëse i them të bëjë diçka, ai e bën”. Deklaratat vijnë në një moment kur SHBA-ja po intensifikon përpjekjet diplomatike për të shmangur një përshkallëzim të mëtejshëm të tensioneve mes Izraelit dhe Iranit.