Në një videomesazh drejtuar popullit izraelit, kryeministri Benjamin Netanyahu tha se “ne do t’i shpëtojmë të gjitha pengjet, duke luftuar boshtin e së keqes së Iranit”. Kryeministri izraelit ofroi ngushëllimet e tij për familjet e tetë ushtarëve të vrarë të mërkurën në operacionet në Libanin jugor në një deklaratë të filmuar menjëherë pasi IDF njoftoi vdekjen e tyre. “Dëshiroj të dërgoj ngushëllimet e mia të sinqerta për familjet e heronjve tanë që ranë sot në Liban. Ne jemi në mes të një lufte të ashpër kundër boshtit të së keqes të Iranit, i cili kërkon të na shkatërrojë. Kjo nuk do të ndodhë sepse ne do të qëndrojmë të bashkuar dhe me ndihmën e Zotit do të fitojmë së bashku”, shprehet Netanyahu. Ai përmendi gjithashtu rreth 100 pengje që kanë mbetur në duart e Hamasit në Rripin e Gazës, si dhe izraelitët që kanë lënë shtëpitë e tyre në veri për shkak të Hezbollahut, duke thënë se “Ne do të shpëtojmë pengjet tona në jug, do të kthejmë banorët në veri, do të garantojmë përjetësinë e Izraelit”. Kujtohet se të mërkurën IDF njoftoi vdekjen e një ushtari dhe më pas të shtatë të tjerëve në incidente të veçanta në Libanin jugor.