Kryeministri izraelit, Benjamin Netanyahu, i kërkoi të dielën presidentit të vendit falje në gjyqin e tij për korrupsion, që po zgjat për vite të tëra, duke argumentuar se procedurat penale po pengonin aftësinë e tij për të qeverisur dhe se një falje presidenciale do të ishte e dobishme për Izraelin. Netanyahu, kryeministri që ka shërbyer më gjatë në historinë e Izraelit, ka mohuar akuzat për ryshfet, mashtrim dhe shkelje të besimit. Avokatët e tij thanë në një letër drejtuar zyrës së presidentit se kryeministri ende beson se procedurat ligjore do të përfundojnë me një pafajësi të plotë. “Avokatët e mi dërguan një kërkesë për falje te presidenti i vendit. Pres që kushdo që dëshiron të mirën e vendit të mbështesë këtë hap. Unë jam i detyruar të dëshmoj tre herë në javë… Kjo është një kërkesë e pamundur, e cila nuk u bëhet as qytetarëve të tjerë”, tha Netanyahu. Zyra e presidentit të Izraelit, Isaac Herzog, njoftoi se kanë pranuar kërkesën, duke e publikuar edhe letrën e avokatëve. Presidenti i SHBA-së, Donald Trump, këtë muaj i shkroi Herzogut, duke e nxitur të konsiderojë dhënien e faljes për kryeministrin, duke argumentuar se çështja kundër tij ishte “një ndjekje penale politike dhe e pajustifikuar”. Ndaj Netanyahut u ngritën akuza më 2019 në tre raste të ndara, por të lidhura mes tyre, që kanë në qendër akuzat se ai u ka dhënë favore figurave të njohura të biznesit në këmbim të dhuratave dhe mbulimit mediatik në favor të tij. Kryeministri izraelit ka mohuar vazhdimisht çdo akuzë.