Të mërkurën më 7 maj, në Kapelën Sistine do të nisë Konklava për zgjedhjen e Papës së ri, pas mbylljes tradicionale të dyerve me frazën latine “extra omnes”, që do të thotë “të gjithë jashtë”. Në këtë ceremoni solemne do të marrin pjesë 133 kardinalë me të drejtë vote, të gjithë të mbërritur tashmë në Romë që nga e hëna, ndërsa përgatitjet në Kapelën Sistine kanë përfunduar. Votojnë vetëm kardinalët që janë nën 80 vjeç dhe duhen 2/3 e votave, ose 89 të tilla për të përcaktuar papën e ri. Konklava është një nga ngjarjet më të rëndësishme në jetën e Kishës Katolike, dhe ky proces i zgjedhjes së Papës së 267-të në histori pritet me vëmendje nga e gjithë bota. Kardinalët do të udhëhiqen në këtë vendim madhor nga ideali “Në një botë të ndarë, një Papë që bashkon”, që është bërë busull frymëzuese për shumë prej tyre. Çdo ditë e Konklavës përfshin dy seanca votimi: një paradite dhe një pasdite. Secila përbëhet nga dy vota, duke filluar në orën 10:30 paradite dhe në orën 17:30 pasdite. Nëse nuk ka zgjedhje të Papës pas votimeve, tymi i zi (shenjë që nuk është arritur shumica e kërkuar) do të ngrihet në orën 12:00 dhe 19:00. Megjithatë, në rast se një Papë zgjidhet në cilëndo prej votave, tymi i bardhë mund të ngrihet menjëherë, duke sinjalizuar se Kisha ka një Papë të ri. Kurrë në historinë e Kishës zgjedhja e Papës nuk është bërë që në votimin e parë.