Momente paniku janë regjistruar në një fluturim të Ryanair nga Selaniku drejt Memmingenit, pasi një dritare e avionit u shkëput në ajër, duke bërë që një pasagjer të thithej pjesërisht jashtë kabinës. Ngjarja ndodhi rreth 30 minuta pas ngritjes së avionit. Ljubisa Karovic, 61 vjeç nga Serbia, ishte ulur pranë dritares kur, pas një zhurme të fortë, ajo u thye dhe kabina pësoi dekompresion. Gruaja e tij, Svetlana Grkovic, rrëfen se e kapi menjëherë nga këmbët për ta penguar të dilte plotësisht jashtë avionit. “Gjysma e trupit të tij ishte jashtë. Mendova vetëm: ‘Nëse vdesim, vdesim bashkë’”, tha ajo për mediat serbe. Sipas saj, edhe pasagjerët e tjerë ndihmuan për ta tërhequr 61-vjeçarin brenda avionit, ndërsa maskat e oksigjenit ranë dhe në kabinë u krijua panik. Karovic pësoi djegie nga fërkimi dhe lëndime në dorë. Ai ndodhet ende në spital dhe, sipas bashkëshortes, ka humbur disa herë ndjenjat dhe nuk mban mend çfarë ka ndodhur. Avioni vazhdoi fluturimin për rreth 30 minuta, derisa kreu një ulje emergjente në aeroportin e Selanikut.