Rreth 100 milionë euro janë sekuestruar në gjashtë muajt e parë të vitit nga prokuroritë e juridiksionit të përgjithshëm në të gjithë vendin. Vetëm gjatë muajit qershor, Prokuroria e Tiranës, sekuestroi 50 milionë euro pasuri të disa subjekteve tregtare për veprën penale ‘Pastrimi i produkteve të veprës penale ose i veprimtarisë kriminale’. Ndërsa 10 milionë euro pasuri në llogari bankare u sekuestruan në kuadër të hetimeve të skemës së mashtrimit të kredidhënies, administratorëve të subjekteve financiare. Sekuestrime në vlera të mëdha monetare, nga 2 deri në 35 milionë euro, janë realizuar edhe nga prokuroritë e Fierit dhe Vlorës. Pasuri të tjera të tundshme dhe të patundshme si prona, makina si dhe subjekte të ndryshme tregtare janë sekuestruar edhe në Durrës, Elbasan, Sarandë, Lezhë, Gjirokastër dhe Korçë.