Një 38 vjeçar me shtetësi letoneze është gjetur i vdekur dje në një banesë në Shkodër. Mësohet se letonezi ishte rezident në Mbretërinë e Bashkuar, ndërsa alarmin për vdekjen e tij e ka dhënë një miku i tij 52-vjeçar edhe ai rezident në Mbretërinë e Bashkuar. Dy shtetasit e huaj sipas policisë së Shkodrës kishin ardhur për qëllime turistike në vendin tonë. Por pasditen e djeshme, njëri prej tyre telefonoi sallën operative të Policisë së Shkodrës, dhe njoftoi se në banesën që kishin marrë me qira në lagjen “Gjuhadol”, ka gjetur të pajetë shokun e tij 38-vjeçar. Një grup hetimor u ngrit në vendngjarje dhe po vijon punën për sqarimin e rrethanave të ngjarjes dhe për dokumentimin e shkakut të humbjes së jetës së 38-vjeçarit. Megjithatë nga veprimet e deritanishme hetimore të policisë ka rezultuar se 38-vjeçari i ardhur në Shqipëri, për qëllime turistike, e ka humbur jetën për shkaqe natyrore.