Një 19-vjeçar i kërkuar nga policia për përfshirjen në plagosjen e rëndë të tre personave është gjetur dhe arrestuar në fshatin Pjezë të Shijakut, ku fshihej. Operacioni i koduar “Village” u zhvillua nga strukturat e Policisë së Durrësit, në bashkëpunim me Komisariatin e Shijakut dhe Njësinë Operacionale, pas sigurimit të informacionit për vendndodhjen e të riut. Sipas policisë së Durrësit, në pranga përfundoi Lorik Çelmeta, 19 vjeç, banues në Shijak, ndaj të cilit Gjykata e Durrësit kishte caktuar masën e sigurisë “Arrest në burg”. Sipas hetimeve të policisë, Çelmeta dyshohet se mbrëmjen e 26 korrikut, në lagjen nr. 13, në zonën e Plazhit në Durrës, në bashkëpunim me një tjetër person, gjatë një konflikti për motive të dobëta, ka goditur me mjete prerëse tre shtetas. Në fillim të gushtit, gjykata pati vendosur në mungesë masën “Arrest në burg” për dy të dyshuarit. Policia vijon punën për lokalizimin dhe kapjen e personit tjetër të dyshuar për përfshirjen në ngjarje kriminale.