Pas konfirmimit të rastit të parë me Ethet e Nilit në vend, i cili u identifikua në qytetin e Korçës, një ekip specialistësh të ISHP-së nga Tirana ka mbërritur në terren për kryerjen e hetimit entomologjik dhe depistimin në vatër. Specialistët po kryejnë hetime në zona të ndryshme të qarkut për të evidentuar praninë e mushkonjës bartëse, ndërsa paralel me depistimin pritet të nisë edhe dezinsektimi i zonave të identifikuara. Pacienti i konfirmuar është një 72-vjeçar nga Korça, i cili ndodhet në Spitalin Rajonal duke marrë trajtimin e nevojshëm mjekësor. I moshuari dyshohet se u pickua gjatë kohës që qëndronte në një lulishte të qytetit, ku kalonte një pjesë të konsiderueshme të ditës. Pas shfaqjes së shqetësimeve shëndetësore, ai u paraqit në spital, ku analizat konfirmuan praninë e virusit. Ndërkohë, autoritetet shëndetësore po vijojnë monitorimin intensiv në terren për të përcaktuar shkallën e përhapjes së mushkonjës bartëse dhe për të parandaluar raste të tjera infektimi.