Gazeta britanike The Times ka publikuar një investigim të detajuar për mënyrat e reja se si shqiptarët po mbërrijnë në Mbretërinë e Bashkuar, duke përfshirë reklama në TikTok që promovojnë kalimet ilegale. Pas një rënieje të dukshme të mbërritjeve me gomone, trafikantët kanë filluar të përdorin metoda të tjera, si kalimet me kamionë ose pasaporta të falsifikuara, duke shfrytëzuar platformat sociale për të rekrutuar emigrantë. Çmimet për udhëtimet ndryshojnë, me tarifa që arrijnë deri në 23.000 stërlina për kalimet me kamion, dhe deri në 3,000 paund për ata që zgjedhin udhëtimet me gomone. Një reklamë tjetër, e shoqëruar me një foto të një automjeti duke hipur në Eurotunnel, thoshte: “Si arrijnë britanikët në Francë për 35 minuta? Udhëtim me tren për në Angli. Për 40-50 minuta mbërrini në Mbretërinë e Bashkuar. Pagesa në mbërritje”. Videoja kishte në sfond një këngë popullore për qytetin e Tropojës, nga i cili mijëra njerëz u larguan drejt Mbretërisë së Bashkuar në vitin 1998, pas kolapsit të ekonomisë shqiptare. Një reklamë e tretë thoshte: “Kemi udhëtime çdo ditë për në MB në pjesën e pasme të kamionit”. Ofronte një çmim prej 2.300 paund për një vend në pjesën e pasme të një kamioni nga Belgjika në Mbretërinë e Bashkuar. Reklamat janë një shembull i taktikave të përdorura nga “ndërmjetësit e emigrantëve” shqiptarë. Shqiptarët shpesh janë “ndërmjetës” të punësuar nga grupe më të mëdha të krimit të organizuar për të gjetur klientë në vendlindjen e tyre, duke fituar komision për çdo person që u kalojnë më tej.