Ushtria e Ukrainës ka ndryshua taktikën e sulmeve të saj me rreze të gjatë brenda territorit rus, duke shënjestruar shtyllat e tregtisë elektronike dhe logjistikës civile të vendit. Pasi goditi me dronë qendrat e kompanisë Ëildberries, Kievi ka vënë tashmë në shënjestër tregun e dytë më të madh online në Rusi, kompaninë Ozon. Gjiganti rus Ozon konfirmoi të dielën se një zjarr masiv ka shpërthyer në qendrën e tij të madhe logjistike në rajonin qendror të Orenburgut, pas një sulmi me dronë ukrainas, duke detyruar pezullimin e menjëhershëm të të gjitha operacioneve. Kjo goditje vjen vetëm 24 orë pas një sulmi të ngjashëm të shtunën ndaj një tjetër objekti të Ozon në rajonin fqinj të Samarës, ku mbetën të plagosur edhe disa punëtorë. Gjithashtu, gjatë natës është raportuar goditja e një qendre tjetër logjistike pranë një objekti të Ozon në periferi të Shën Petersburgut. Ministria e Mbrojtjes e Ukrainës doli me një deklaratë zyrtare duke konfirmuar se këto sulme janë pjesë e një fushate të qëllimshme për të gjunjëzuar rrjetin e shpërndarjes të Rusisë, i cili dyshohet se përdoret edhe për furnizimin e ushtrisë me pjesë këmbimi. Sakaq edhe Rusia ka vijuar sulmet mbi Ukrianë. Ekipet e shpëtimit kanë evakuuar 573 pasagjerë pasi një dron rus goditi një tren pasagjerësh në rajonin e Odesës në jug të Ukrainës, duke i vënë flakën lokomotivës, sipas policisë dhe shërbimeve të emergjencës. Ndërsa evakuimi ishte në vazhdim, një dron i dytë goditi të njëjtin tren - megjithëse nuk u raportuan viktima ose të lënduar. Nëntëmbëdhjetë autobusë u vendosën për të transportuar pasagjerët në një vend të sigurt.