Rusia nuk ka marrë asnjë informacion zyrtar në lidhje me rezultatin e bisedimeve të Gjenevës, deklaroi zëdhënësi i Kremlinit, Dmitry Peskov. I pyetur lidhur me ndryshimet që raporton ne planin e paqes së Trumpit, sidomos lidhur me një klauzolë që kishte të bënte me NATO-n dhe Ukrainën e cila dukej se ia linte derën hapur Kievit për t'u bashkuar në të ardhmen me aleancën ushtarake të udhëhequr nga SHBA, Peskov u përgjigj kjo është "një çështje shumë e rëndësishme dhe komplekse për të cilën nevojiten informacione më të thelluara sesa thjesht raportet në media”. Moska, theksoi ai, do të mbështetet vetëm në të dhënat e përftuara përmes kanaleve zyrtare. Rishikimi i draftit amerikan u pa sakaq nga kreu i diplomacisë gjermane, Johann Wadephul, si një sukses për evropianët. Të gjitha çështjet që kanë të bëjnë me Europën dhe NATO-n janë hequr nga plani origjinal i SHBA-së, tha ai. “Ky është një sukses vendimtar. Marrëveshja nuk duhet të arrihet mbi kokat e evropianëve dhe ukrainasve. Duhet të sigurohet që sovraniteti i Ukrainës të ruhet dhe që vetë Ukraina të vendosë se çfarë lëshimesh bën”, ishte komenti i tij. Mediat italiane nderkohe përmendin mundësinë që presidenti amerikan Trump ta shtyjë me një javë afatin e vendosur Kievit për të pranuar planin e tij të paqes, e qe normalisht skadon të enjten në 27 nëntor.