Katër raste të ndërtimeve të paligjshme u zbuluan të hënën nga policia e Sarandës, ndërsa u proceduan penalisht pronarët e objekteve ku po kryheshin punimet. Gjatë kontrolleve të ushtruara në zonën bregdetare të Ksamilit, agjentët konstatuan tre ndërtesa ku po kryheshin ndërhyrje pa lejen e organeve kompetente. Menjëherë punimet u ndaluan dhe pronarët u vendosën nën hetim. Ndërkohë rasti tjetër u zbulua në qytetin e Sarandës. Për të gjitha rastet materialet procedurale u referuan pranë organit të akuzës për veprime të mëtejshme. Vetëm gjatë këtij muaj, policia e Sarandës në kuadër të operacionit “Coastline”, që ka ndërmarrë, ka goditur 16 raste të kësaj veprimtarie të kundraligjshme, për të cilat ka nisur procedim penal për 16 persona. Uniformat blu thonë se do ta vijojnë aksionin për ndalimin e krimeve kundër mjedisit dhe në ditët në vijim dhe se do të ndëshkojnë çdokënd që ndërton pa leje.