Varrimi me nderime shtetërore dhe ushtarake i “Kasapit të Ballkanit”, Ratko Mlladiç, mund t’i kushtojë Serbisë integrimin në Bashkimin Evropian. Komisioni Evropian paralajmëroi Beogradin se mundësia e vazhdimit të bisedimeve për pranimin e saj në union do të shqyrtohet pas ceremonisë madhështore që iu bë Mlladiç, i dënuar për gjenocid, krime lufte dhe krime kundër njerëzimit. "Siç e dini, diskutimet mbi Grupin 3 janë duke u zhvilluar aktualisht me shtetet anëtare. Dhe, për këtë diskutim duhet të merren parasysh zhvillimet e fundit politike që i kemi parë". Guillaume Mercier, zëdhënësi i Komisionit Evropian për zgjerimin Serbia nuk ka hapur asnjë kapitull të ri negociatash që nga dhjetori i vitit 2021. Fillimisht, arsyeja për këtë ishte mungesa e përputhshmërisë me politikën e jashtme të BE-së, kryesisht dështimi për të vendosur sanksione ndaj Rusisë në përgjigje të agresionit kundër Ukrainës, ndërsa më vonë gjendja e sundimit të ligjit nxiti më tej skepticizmin e disa shteteve anëtare. Gjendja është ndërlikuar edhe më shumë tani pas ngjarjeve lidhur me vdekjen dhe varrosjen e Mlladiçit. Më herët, Presidentja e Komisionit Evropian, Ursula von der Leyen, dhe presidenti i Këshillit Evropian, Antonio Costa, lëshuan një deklaratë të përbashkët, duke i përshkruar skenat nga Beogradi gjatë varrimit të kriminelit të dënuar të luftës, Mlladiç, si "tronditëse". Ngjarja u dënua për herë të parë edhe nga Shqipëria. Ministri i Jashtëm, Ferit Hoxha, theksoi se glorifkimi i kriminelëve të luftës bie ndesh me vlerat evropiane. “Rajoni ynë ka një të ardhme për të ndërtuar së bashku. Kjo e ardhme duhet të jetë evropiane: e rrënjosur në paqe, pajtim, bashkëpunim, respekt të ndërsjellë dhe respekt të palëkundur për kujtimin e atyre që vuajtën nga tmerret e luftës”, thekson shefi i diplomacisë shqiptare.