Aleatët e NATO-s dolën sërish kundër presidentit amerikan, Donald Trump. Ata u shprehën se nuk do të përfshihen në vendimin e tij për të bllokuar Ngushticën e Hormuzit. Aleatët e NATO-s, përfshirë Britaninë dhe Francën, kanë thënë se nuk do të përfshihen në konflikt. Ata njoftuan se po punojnë për gjetjen e një zgjidhjeje për të hapur rrugën detare, përmes së cilës kalojnë rreth një e pesta e furnizimeve botërore të naftës. “Ne nuk e mbështesim bllokadën”, tha kryeministri britanik Keir Starmer për BBC, duke shtuar se “Cilido qoftë presioni, ne nuk do të përfshihemi në luftë”. Franca do të organizojë një konferencë me Britaninë dhe vende të tjera për të ngritur një mision shumëkombësh për të rivendosur lundrimin në ngushticë, tha Presidenti francez, Emmanuel Macron. Iniciativa synon të vendosë rregulla për kalimin e sigurt dhe koordinimin e anijeve ushtarake që shoqërojnë cisternat, shpjegoi Starmer në parlamentin britanik të hënën. Sipas një burimi diplomatik francez, një takim për të hartuar plane për këtë mision, që përfshin rreth 30 vende, mund të zhvillohet që të enjten në Paris ose Londër. Një burim tjetër diplomatik evropian shprehu dyshime nëse Trump do ta mirëpriste një mision të tillë.