Sekretari i përgjithshëm i NATO-s, Mark Rutte, bëri thirrje për një rritje prej 400 për qind të mbrojtjes kundërajrore dhe raketore, për të mbrojtur aleancën veriatlantike nga kërcënimet e Rusisë. “Në Ukrainë po shohim se si Rusia përdor terrorin nga ajri, prandaj do ta forcojmë mburojën që mbron qiellin tonë. NATO-s i duhet një rritje prej 400 për qind e kapaciteteve të mbrojtjes ajrore dhe raketore për ta ruajtur një parandalim dhe mbrojtje të besueshme. Fakt është që kemi nevojë për një rritje të madhe në mbrojtjen tonë kolektive”, tha Rutte gjatë një fjalimi në Londër. Por, Moska i ka dënuar menjëherë deklaratat e tij, duke e cilësuar NATO-n si një “instrument agresioni”. “NATO po shfaqet si një instrument agresioni dhe përballjeje”, deklaroi zëdhënësi i Kremlinit, Dmitry Peskov, para gazetarëve në Moskë. Vendet anëtare të NATO-s janë duke punuar për t’i rritur kapacitetet e tyre mbrojtëse që prej fillimit të luftës së Rusisë kundër Ukrainës në shkurt 2022. “Rreziku nuk do të zhduket as kur të përfundojë lufta në Ukrainë. Na duhen më shumë trupa dhe kapacitete për të zbatuar plotësisht planet tona mbrojtëse. Ushtritë tona kanë gjithashtu nevojë për mijëra automjete të blinduara dhe tanke, si dhe miliona predha artilerie. NATO duhet të bëhet një aleancë më e fortë, më e drejtë dhe më vdekjeprurëse”, theksoi Rutte. Britania javën e kaluar njoftoi plane për ndërtimin e deri në 12 nëndetëseve bërthamore dhe gjashtë fabrikave për prodhimin e municionit dhe predhave, si përgjigje ndaj asaj që e cilëson si kërcënim nga Rusia. Gjatë qëndrimit në Londër, Rutte u takua dhe me kryeministrin e Britanisë së Madhe, Keir Starmer, për herë të dytë në Downing Street që nga ardhja në pushtet e liderit laburist në korrik 2024.