Ish-ministri i Drejtësisë, Nasip Naço, mohon të ketë dhënë leje të veçantë për lirimin nga burgu të të penduarit të drejtësisë, Nuredin Dumani. Në një reagim, pas dëshmisë së bashkëpunëtorit të drejtësisë që përmendi emrin e tij para hetuesve, ish-ministri Naço shkruan se distancohet nga çdo akuzë. “Gjatë ushtrimit të detyrës sime si Ministër i Drejtësisë, nuk kam miratuar asnjë leje të veçantë për subjektin në fjalë. Distancohem nga çdo mashtrim, i bërë nga kushdo, individualisht apo në bashkëpunim, për të dëmtuar integritetin tim. Akuzat publike të bëra sot nuk përputhen me faktet reale të ushtrimit të detyrës sime si ministër”. Më tej, Nasip Naço sqaron rolin e ministrit të Drejtësisë, ndërsa iu bën thirrje autoriteteve që të hetojnë rastin. “Nëse akuzat vërtetohen, organet përkatëse duhet të marrin masa ligjore ndaj çdo personi të përfshirë në këtë çështje. Roli i ministrit të Drejtësisë, sipas legjislacionit në fuqi, është i kufizuar. Ministri: nuk heton, nuk ngre akuza, nuk pushon çështje, nuk jep vendime fajësie apo pafajësie”. Për Nasip Naçon, detyra e ministrit të Drejtësisë lidhet vetëm me dhënien e lejeve të veçanta për të dënuarit, bazuar në ligj.