NASA synon ndërtimin e një baze të përhershme në Hënë, e për këtë publikoi detaje për mjetet robotike që synon të dërgojë në satelitin e vetëm natyror të Tokës. Mes kompanive të përzgjedhura për prodhimin e këtyre pajisjeve është edhe Blue Origin, kompania hapësinore e themeluesit të Amazonit, Jeff Bezos. Nga sa pohon BBC, qëllimi i SHBA-së është të rikthejë astronautët amerikanë në Hënë përpara se presidenti Donald Trump të largohet nga detyra në vitin 2029. Agjensia amerikane e hapësirës është sakaq në garë me Kinën që kërkon gjithashtu të dërgojë njerëz atje; cka dëshmon qartë presionin e madh nën të cilin ndodhet NASA për të treguar se po fiton garën e re hapësinore. Kina duket ka avancuar ndjeshëm me planet e saj për të nisur njerëz në Hënë deri në vitin 2030. Të hënën, ajo lëshoi anijen kozmike Shenzhou-23, duke transportuar një ekuipazh astronautësh drejt stacionit hapësinor Tiangong. Një bazë në Hënë do t`i mundësonte SHBA-së kryerjen e eksperimenteve shekncore, por edhe nxjerrjen me gjasë të burimeve të vlefshme minerare. Pavarësisht entuziasmit që rrethon një nismë të tillë megjithatë, shumica e ekspertëve besojnë se afatet kohore të NASA-s janë jorealiste. Megjithë suksesin e Shteteve të Bashkuara për dërgimin e katër astronautëve rreth Hënës gjatë misionit Artemis II në prill, disa shkencëtarë janë të bindur Kina ka në fakt më shumë mundësi të bëhet vendi i ardhshëm që do të zbresë njerëz në sipërfaqen hënore.