Rregullorja e re që kufizon përdorimin e celularëve gjatë seancave gjyqësore ka shkaktuar reagimin e fortë të avokatëve, të cilët kanë vendosur bojkot pa afat të seancave gjyqësore në Gjykatën e Posaçme Antikorrupsion. Vendimi u mor gjatë mbledhjes së jashtëzakonshme të Këshillit të Dhomës Kombëtare të Avokatisë dhe hyn në fuqi menjëherë. Kreu i Dhomës Kombëtare të Avokatisë, Maks Haxhia, kërkoi pezullimin dhe rishikimin e menjëhershëm të rregullores, si për avokatët, ashtu edhe për median. Ai tha se deri më 8 shtator Dhoma nuk kishte marrë asnjë reagim institucional për shqetësimet e ngritura. “Deri më sot, më 8 shtator, nuk kemi asnjë reagim, qoftë edhe negativ. Është një mungesë respekti institucional që na konfirmon trajtimin që i bëjnë avokatit në seanca konkrete”, deklaroi Haxhia. Ai solli si shembull rastin e avokatit Dorian Matlija, të cilit, sipas tij, i është hequr celulari dhe është gjobitur, ndërkohë që dy përfaqësuesit e akuzës kanë qenë të pajisur me celularë. Ndryshe nga qëndrimet në favor të bojkotit të menjëhershëm, avokati Përparim Sanxhaku kërkoi që fillimisht të shterohen të gjitha rrugët ligjore dhe administrative. “Të ndjekim të gjitha hapat ligjorë para se të shkojmë te bojkoti i seancave. Çfarë do të fitojmë me bojkotin? Sa do ta çojmë? Do ta çojmë në pafundësi? Nëse ka rrugë të ankimit gjyqësor dhe administrativ, të shkojmë në atë rrugë”, deklaroi Sanxhaku.