Në vigjilije të 111-vjetorit të Pavarësisë, kur Tirana ka mbledhur bashkë si asnjë vit më parë, shqiptarë nga anë e kënd botës, kryetari i Bashkisë së Tiranës, Erion Veliaj, organizoi në nder të tyre një pritje në Pallatin e Brigadave, ku dha edhe lajme me rëndësi. “Këshilli Bashkiak sapo aprovoi financimin e shkollës “Dituria” në Preshevë dhe shkollës “Naim Frashëri” në Bujanovc. Bashkia e Tiranës sapo aprovoi ndërtimin e parkut “Shqipëria” në komunën e Tuzit, si një kontribut i një Tirane, që nuk është më Tirana që shumë veta lanë pas në vitet ‘90, e që më shumë lypte se sa bënte, por që sot është një Tiranë që bën, është një Tiranë që më shumë jep se merr, sepse sot i kemi mundësitë e një qyteti modern që ka edhe zemrën për të bërë mirë dhe për të kontribuuar aty ku janë kryetarët tanë, aty ku flitet gjuha jonë dhe aty ku fëmijët tanë në ato shkolla, tani të reja dhe të bukura, do të mësojnë gjuhën tonë më të bukurën, shqipen” Veliaj u shpreh krenar për mbrojtjen me fanatizëm të kultit të atdheut te çdo bashkëkombasi shqiptar.