Elon Musk është tërhequr nga pozicioni i ashpër që mori në sherrin publik me Donald Trump, e tani thotë se i vjen keq për disa nga postimet e tij në lidhje me presidentin amerikan. CEO i Tesla-s kërkoi shkarkimin e Trump dhe pretendoi se emri i tij shfaqet në dosjet e abuzuesit seksual Jeffrey Epstein.““Më vjen keq për disa nga postimet e mia rreth presidentit Donald Trump javën e kaluar. Ato shkuan shumë larg”, ka shkruar Musk në platformën e tij X. Postimi vjen gati një javë pas përplasjes me shefin e Shtëpisë së Bardhë përmes të njëjtës platformë, cka shënoi një goditje të fortë për marrëdhënien e ngushtë mes tyre, që shënjoi të gjithë pjesën e parë të administratës së dytë të Trumpit. Të dy ata, si përdorues të zjarrtë të mediave sociale, përshkallëzuan ndjeshëm në rrjet retorikën kundër njëri-tjetrit, deri në pikën ku Musk doli me pretendimin se Trump nuk do të kishte fituar zgjedhjet e vitit 2024 pa ndihmën e tij, ndërsa presidenti argumentoi se Tesla po “kalonte një kohë të vështirë” dhe se Musk ishte “i lodhur” kur u largua nga Shtëpia e Bardhë në fund të majit.Elon Musk u largua në fund të muajit të kaluar nga roli i tij qeveritar si këshilltar i lartë i presidentit Donald Trump, pasi udhëhoqi përpjekjet për të reduktuar dhe reformuar burokracinë federale. Largimi i tij shënoi fundin e një kapitulli që përfshiu mijëra largime nga puna, shuarjen e agjencive qeveritare dhe një sërë padish.