Rritja e çmimeve të drithërave pas vendimit të Rusisë për të mos rinovuar marrëveshjen e grurit ukrainas kërcënon që miliona njerëz të përballen me uri, ku sipas Organizatës së Kombeve të Bashkuara kjo situatë do të sjellë edhe vdekje. Rusia është larguar nga marrëveshja për drithërat të hënën, duke arsyetuar se kërkon që t’i përmirësojë kushtet për eksportet e saj të produkteve ushqimore dhe plehrave për bujqësi, duke akuzuar se produkti nuk është fërguar drejt vendeve të varfra. Çmimet e grurit kanë shënuar rritje 8.2 për qind, dhe tani një ton shitet për 253.75 euro, ndërsa çmimet e misrit janë rritur me 5.4 për qind. Këto kosto pritet të ndjehen akoma më shumë nga familjet e vendeve në zhvillim, ndërsa pasojat e rënda do të përjetohen në 363 milionë persona nga 69 shtete me nevoja për ndihmë humanitare. Marrëveshja kishte për qëllim ta zbuste krizën globale të ushqimit duke i lejuar drithërat ukrainase të eksportoheshin në mënyrë të sigurt. Marrëveshja për drithërat është ndërmjetësuar nga Kombet e Bashkuara dhe Turqia për ta luftuar krizën ushqimore globale, të përkeqësuar nga lufta e Rusisë në Ukrainë, e nisur më 24 shkurt të vitit 2022. Ukraina dhe Rusia janë ndër eksportuesit më të mëdhenj të drithërave në botë. OKB-ja raportoi se nga marrëveshja për drithërat përfituam shtetet e varfra, pasi çmimet për produktet ushqimore pësuan 23 për qind ulje.