Gjykata e Apelit në Francë vendosi të lërë në qeli biznesmenin shqiptar, Ermal Beqiri, duke rrëzuar kërkesën e tij për liri. Ndërsa vijojnë procedurat për ekstradimin e tij drejt Shqipërisë, biznesmeni Beqiri, një prej figurave kyçe në dosjen e SPAK për tenderat e AKSHI-t, u përball me drejtësinë franceze. Gjatë seancës gjyqësore, ai u shpreh me ironi para togave të zeza se mund të ishte fshehur kudo, por zgjodhi Francën, për shkak të lidhjeve me këtë vend. “Arrita në Francë në moshën 16 vjeç, kam familjen time të dytë këtu. Po, lëviz shumë, në Turqi, Slloveni, Francë… Mund të kisha shkuar kudo, madje edhe në Dubai, por e dua Francën. Edhe nëse nuk zgjodha vendin më të mirë për t’u fshehur, as më të mirin për taksat…”. Avokati i biznesmenit të arrestuar argumentoi se ai është viktimë e "ndalimit të paligjshëm", duke shtuar se përpara incidentit të Penly, klienti i tij kishte zbuluar se ishte i kërkuar dhe kishte informuar autoritetet franceze: "Ai u vu në dispozicion, dha adresën e tij, si mund të flasim për një 'të arratisur të kërkuar'?, tha gjatë seancës mbrojtja e Beqirit. Ermal Beqiri u arrestua pasi fluturoi me avionin e tij privat në një lartësi të ulët mbi centralin bërthamor Penly të Francës. Përballë autoriteteve franceze, më 27 korrik, Beqiri ka deklaruar se kishte gabuar me lartësinë e fluturimit dhe se në momentin kur kaloi mbi central ishte duke folur në telefon me nënën e tij. Ai u dënua nga autoritetet franceze me një gjobë prej 7 mijë eurosh, por vijon të qëndrojë në burg, pasi autoritetet shqiptare i kanë dërguar Francës një kërkesë për ekstradimin e tij. Hetimet e SPAK zbuluan se Ermal Beqiri kishte blerë një kështjellë me vlerë 2,6 milionë euro në Francë dhe kishte një llogari bankare me vlerë 2 milionë euro. SPAK e akuzon biznesmenin për veprat penale “Konkurrenca e paligjshme nëpërmjet dhunës”, “Heqja e paligjshme e lirisë”, “Shkelja e barazisë së pjesëmarrësve në tenderë apo ankande publike”, “Grupi i strukturuar kriminal”, “Pastrimi i produkteve të veprës penale ose veprimtarisë kriminale” dhe “Korrupsioni aktiv i personave që ushtrojnë funksione publike”.