Ministria e Shëndetësisë reagoi pas vdekjes së 37-vjeçares shtatzënë nga Pogradeci, teksa po transportohej me ambulancë drejt Tiranës. Ndërsa shpreh ngushëllime për familjen, ministria njofton se ka kërkuar një vlerësim të plotë dhe të pavarur të mënyrës si është trajtuar pacientja, duke përfshirë çdo hap nga paraqitja e saj në spital deri në përfundimin e trajtimit. Ministria thekson se rezultatet do të shqyrtohen me seriozitet dhe, nëse konstatohen parregullsi apo mangësi, do të merren masa sipas ligjit. 37-vjeçarja me inicialet M. K. humbi jetën teksa transportohej drejt Tiranës, për shkak të problemeve shëndetësore. Ajo e kishte shtatzëninë e parë dhe ishte rreth 28-29 javëshe. Sipas të dhënave nga spitali i Pogradecit ajo është paraqitur në maternitet rreth orës 1 të mëngjesit, pasi kishte pasur dhimbje barku, të cilat i kishte duruar në kushte shtëpie për disa orë. Pas mbërritjes në maternitet janë bërë ekzaminimet e para dhe nga mjekët është konstatuar se kishte gjak në bark. Gjendja ka ardhur duke u përkeqësuar ndaj mjekët kanë vendosur që të transportohej drejt Tiranës për trajtim të specializuar. Gjatë transportit gjendja e saj është përkeqësuar dhe ambulanca është kthyer në spitalin e Elbasanit, por nëna ka ndërruar jetë. Shkaqet dhe rrethanat e sakta të vdekjes pritet të zbardhen pas kryerjes së veprimeve procedurale dhe ekspertizës mjeko-ligjore.