Nga ekspertiza e kryer ndaj Klea Prengës, rezulton se lëndimet që i kanë shkaktuar motrat Berisha, hyjnë në kategorinë e dëmtimeve të rënda trupore. Ekspertiza del dy muaj pasi e reja u dhunua nga Antonela dhe Marinela Berisha, të cilat janë ende në kërkim. Aty thuhet se përveç prishjes së imazhit dhe humbjes së punës, Klea Prenga ka mpirje të anës së djathtë të fytyrës dhe kryesisht buzës së sipërme nga ana e djathtë. ‘U konstatua mbetje e plagëve në fytyrë me karakteristikat dhe lokalizimet e lartpërmendura, shoqëruar me asimetri të dukshme të buzës së sipërme dhe muskulatures së anës së djathtë të fytyrës. Këto dëmtime janë të përhershme, të pariparueshme vetvetiu apo me teknika të zakonshme mjekësore, si të tilla kanë dhënë për pasojë shëmtim tek shtetasja e mësipërme; ndaj bazuar mbi kriterin e “shëmtimit” këto dëmtime hyjnë në kategorinë e dëmtimeve të rënda trupore”-thuhet në aktekspertizë.