Që prej të dielës, i gjithë vendi është përfshirë nga moti i keq, me reshje të dendura shiu e dëbore dhe stuhi të forta ere, duke krijuar probleme në shumë zona, kryesisht në veri, ndërsa të gjithë autoritetet ndodhen në terren. Në Qarkun e Shkodrës vijojnë reshjet e dëborës, shoqëruar me erë të fortë, duke bllokuar rrugë dhe izoluar zona të thella, ndërsa ka pasur edhe probleme me energjinë elektrike. Situatë e vështirë vijon të jetë edhe në Qarqet e Dibrës dhe Kukësit, ku shumë zona të thella janë të izoluara, ndërsa prezenca e dëborës dhe ngricave vështirëson qarkullimin në të gjitha rrugët. Për shkak të situatës së rënduar, është pezulluar mësimi në shumë shkolla në Kukës, Has, Peshkopi, Mat e Bulqizë. Situata është e rënduar edhe në Qarkun e Elbasanit, ku në Librazhd e Gramsh janë të bllokuara rrugët e fshatrave, ndërsa ka pasur probleme dhe me energjinë elektrike. Erërat e forta sollën probleme të shumta në Lezhë, u raportua për rënie pemësh e shtyllash tensioni, duke dëmtuar mjete e biznese dhe duke krijuar probleme me energjinë, ndërsa era rrëzoi dhe një kamioncinë mbi Urën e Milotit, duke bllokuar për pak minuta qarkullimin. Në Kurbin janë të mbyllura të gjitha shkollat, në Rrëshen raportohet për dy shkolla të mbyllura, ndërsa në Lezhë vijoi mësimi normalisht. Verilindja vijon të jetë problematike, ku zonat e thella janë të bllokuara nga dëbora, ndërsa autoritetet vijojnë punën për hapjen e rrugëve. Probleme raportohen edhe me energjinë elektrike në disa njësi administrative. Ndërkohë, pas shumë orësh bllokim, pala greke njoftoi këtë pasdite se do të lejojë kalimin e mjeteve të tonazhit të rëndë në Kapshticë. Në Vlorë është rikthyer frika e përmbytjeve, ku ka ende prezencë uji në zonat periferike. Në lagjen Periferike Kushtrimi mbi 20 banesa janë të rrethuara nga uji dhe banorët nuk lëvizin dot. Ndërkohë, reshjet masive të shiut kanë krijuar prezencë të lartë balte në qytet. Edhe Qarku i Gjirokastrës është përfshirë nga moti i keq, por pa shkaktuar probleme në qarkullim.