Prefekti i Korçës, Nertil Jole, teksa i referohet motit të keq, raportoi se situata në fshatin Sheqeras paraqitet më e qëndrueshme pas shqetësimeve për rritjen e nivelit të ujit në kanale si pasojë e prurjeve të vrullshme të lumit Devoll. Ai u shpreh se bashkë me kryetarin e bashkisë po kryhet një monitorim i detajuar i zonës, pas disa sinjalizimeve të marra më herët. Megjithatë ai theksoi se po vijojnë marrjen e masave parandaluese për shkak të mundësisë së reshjeve gjatë natës. “Me kryetarin e bashkisë e gjykuam që të bëjmë një monitorim më të detajuar këtu në Sheqeras prej disa sinjalizimeve që morëm duke qenë se kuotat e kanaleve kishin një lloj rritje si pasojë të prurjeve shumë të vrullshme të lumit Devoll. Lajmi i mirë nga informacionet është që kemi tani nga punonjësit e digës së Zëmblak-ut, në këtë një orë të fundit ka një ulje përafërsisht 1 metër të thellësisë së lumit, në këtë kuptim është qetësuar situata. Megjithatë janë duke u marrë masat për të evituar nëse do të këtë ndonjë rast precipitimi në kushte që mund të kemi edhe reshje gjatë natës, çdo risk që mund të atakonte edhe të prektë situatën e fshatit dhe në këtë kuptim jemi duke vlerësuar dhe gjykuar me gjithë ekspertët mënyrës se si do e adresojmë situatën në një raste precipitimi dhe reshjeve intensive në vazhdim. Nuk ka rrezik për evakuim edhe në kushtet e motit aktualisht nuk është ky rrezik”, u shpreh prefekti, Nertil Jole.