Përkeqësimi i kushteve atmosferike në det ka krijuar vështirësi për anijet mbrëmjen e së enjtes në gjirin e Durrësit. Një rimorkiator ka dalë në breg, ndërsa një tjetër anije u përball me vështirësi, por pa pasoja serioze. Rimorkiatori “Admiral”, që i përket një kompanie shqiptare dhe ka flamur të huaj, është nxjerrë në breg nga era që frynte e fortë nga drejtimi jug-perëndim. Në bord ndodheshin dy persona, të cilët shpëtuan pa lëndime. Ndërkohë, një tjetër anije “Ocean”, i është gjendur në vështirësi për shkak të dallgëve të fuqishme, por situata është menaxhuar nga vetē ekuipazhi i anijes. Autoritetet detare kanë qëndruar në gatishmëri, duke monitoruar nga afër lëvizjet në zonë dhe duke ndërhyrë aty ku ka qenë e nevojshme. Rimorkiatori është një anije e njohur për rolin në ndihmë të mjeteve të tjera lundruese, po këtë herë është bërë vetë objekt për t'u ndihmuar. Për shkak të errësirës dhe detit të trazuar ndërhyrja për ta kthyer në det rimorkiatorin është vendosur të bëhet mëngjesin e së premtes.