Sulmet me dronë si nga Rusia dhe Ukraina shkaktuan viktima të tjera në të dy vendet. Presidenti Zelenski tha se objektiv i Moskës është frikësimi i popullsisë dhe dëmtimi i infrastrukturës. Të paktën tre persona humbën jetën dhe më shumë se 30 të tjerë u plagosën gjatë sulmit të fundit ajror rus në Ukrainë, njoftoi presidenti i vendit Volodymyr Zelensky. Ai thotë se rajone në të gjithë vendin u shënjestruan si pjesë e një "strategjie të qëllimshme" për të "frikësuar civilët dhe shkatërruar infrastrukturën". Forcat ajrore të Ukrainës deklaruan se Moska lëshoi 619 dronë dhe raketa. Ministria e mbrojtjes e Rusisë tha se në "sulmin e saj masiv" përdori "armë precize" dhe shënjestroi objekte ushtarako-industriale. Po ashtu Rusia deklaroi se katër persona u vranë në një sulm ukrainas me dron në rajonin e Samarës. Kievi goditi edhe një rafineri të madhe nafte atje. Zelensky tha të shtunën se planifikonte të takohej me homologun amerikan Donald Trump në kuadër të Asamblesë së Përgjithshme të Kombeve të Bashkuara, që do të zhvillohet në Nju Jork javën e ardhshme. Sulmet ndërkufitare me dronë janë bërë një kthyer në taktikën më të spikatur të luftës mes Rusisë dhe Ukrainës. Në korrik, një sulm intensiv me dronë ukrainas detyroi mbylljen e përkohshme të të gjitha aeroporteve të Moskës. Kiev shënjestron në mënyrë sistematike objektet e prodhimit dhe përpunimit të naftës ruse, por edhe pika të tjera kyçe industriale, që luajnë një rol kyç për vijimin e luftës së Rusisë në Ukrainë. Ndërkohë, Moska ka përshkallëzuar sulmet e saj ajrore ndaj Ukrainës javët e fundit, ndërsa Kievi dhe aleatët e saj perëndimorë - përfshirë SHBA-në - vazhdojnë të bëjnë thirrje për një armëpushim.