Një grevë e doganierëve grekë në pikën e kalimit të Kakavijës pritet të bllokojë kalimin për mjetet dhe pasagjerët. Njoftimin e ka bërë Policia Kufitare e Kakavijës, që sqaron se të hënën në mëngjes nga ora 6 deri në orën 10 nuk do të lejohet lëvizja e mjeteve. Doganierët grekë kanë bojkotuar punën për shkak se protestojnë për pagat e tyre, por pala shqiptare e bën këtë njoftim për të gjithë ata qytetarë shqiptarë që kanë planifikuar të udhëtojnë drejt Greqisë nga pika e Kakavijës. Për katër orë ata duhet të shmangin kalimin, duke mos krijuar as radhë në këtë pikë kalimi me shtetin fqinj. “Policia Kufitare Kakavijë kërkon mirëkuptimin e qytetarëve dhe sugjeron planifikimin e udhëtimeve me automjete në orare të tjera të ditës”, thuhet në njoftimin e policisë kufitare shqiptare. Policia Kufitare e Kakavijës sqaron gjithashtu se përmes kësaj pike do të lejohen të qarkullojnë vetëm këmbësorët pa bagazhe dhe automjetet që do të kenë emergjenca shëndetësore.