Pranvera e vitit të ardhshëm do të shënojë nisjen e një tjetër beteje ligjore për ish-presidentin amerikan Donald Trump, I cili do të përballet për çështjen e keqmenaxhimit të dokumenteve të klasifikuara. Gjyqtarja Aileen Cannon caktoi 20 majin si datë për nisjen e gjyqit ndaj Trump, pavarësisht se ky I fundit kishte shprehur dëshirën që beteja ligjore ndaj tij të niste pas zgjedhjeve presidenciale të vitit 2024. Mirëpo pavarësisht kësaj kërkese të bërë nga avokatët mbrojtës të ish-presidentit republikan, Gjykata vendosi që Trump të përballet me akuzat në kulmin e fushatës zgjedhore. 77-vjeçari, I cili shihet si një ndër pretendentët kyç në radhët e gjithë kandidatët e Partisë Republikane për të garuar zgjedhjet e reja, do të përballet me akuza serioze për ruajtjen e të dhënave sensitive në shtëpinë e tij në Mar-a-Lago. Sipas prokurorëve të çështjes, Trump kishte mbajtur ilegalisht dokumentet e klasifikuara në shtëpinë e tij, pasi u largua nga Shtëpia e Bardhë, dhe pengoi përpjekjet e Qeverisë për t’i rikthyer ato. Të premten, gjyqtarja Cannon, e emëruar nga Donald Trump, njoftoi se gjyqi dyjavor do të zhvillohet në Florida. Muaj më parë, si datë për fillim të gjyqit ishte përmendur 14 gushti i vitit 2023, mirëpo seanca u shty, për t’iu lënë kohë të dyja palëve për përgatitje. Rasti me dokumentet në Mar-a-Lago është vetëm një prej betejave ligjore me të cilat po përballet Trumpi. Në muajin prill, ai është akuzuar dhe për falsifikim të të dhënave të bizneseve në shtetin e Nju Jorkut. Gjatë kësaj jave, ish-presidenti tha se pret arrestimin për trazirat e 6 janarit të vitit 2021 në Kongresin amerikan. Pamjet: AFP