Thesari Amerikan nxori në shitje monedhën 1-dollarëshe amerikane të vitit 2026 me portretin e presidentit Donald Trump, duke shënuar herën e parë që një president në detyrë i SHBA-së paraqitet në një monedhë të prodhuar për përdorim të përditshëm. Sipas Thesarit Amerikan, monedhat kanë hyrë tashmë në qarkullim dhe mund të blihen në pako prej 25 ose 100 copësh. Paketat kushtojnë përkatësisht 61 dhe 154 dollarë. Në praktikë, gjetja e një monedhe të tillë në kusur mund të kërkojë durim, pasi monedhat 1-dollarëshe nuk janë përhapur gjerësisht në mesin e blerësve amerikanë dhe qarkullojnë shumë më rrallë se kartëmonedhat. Në njërën anë të monedhës është paraqitur një shqiponjë, simboli i Shteteve të Bashkuara, ndërsa në anën tjetër ndodhet portreti i Trumpit. Imazhi ngjason me portretin e tij zyrtar, i cili është frymëzuar nga një fotografi e bërë nga policia, gjatë hetimeve në Gjeorgji për akuzat lidhur me ndërhyrjen e dyshuar në zgjedhjet presidenciale të vitit 2020. Monedha u miratua në mesin e marsit nga Komisioni i Arteve të Bukura, anëtarët e të cilit janë emëruar nga Trump. Monedha është hedhur në qarkullim si pjesë e festimeve për 250-vjetorin e Shteteve të Bashkuara, duke e kthyer atë në një objekt të veçantë për koleksionistët. Pavarësisht ngjyrës së saj, monedha nuk përmban ar. Ajo përbëhet nga 88,5% bakër, ndërsa pjesa tjetër përmban sasi më të vogla zinku, mangani dhe nikeli.