Top Channel ka siguruar pamjet e momentit të plagosjes së punonjësit të “Shqiponjave”, Edlir Alleshi. Ngjarja është regjistruar dy ditë më parë në zonën e Oxhakut në kryeqytet, ku dy patrulla kanë konstatuar një person të dyshimtë dhe kanë kërkuar të ndalojë për kontroll fizik pasi kishin marrë raportime se ishte i rrezikshëm. Kur i ka kërkuar të ndalojë, ai nuk është bindur dhe është larguar me vrap duke detyruar policinë të vihet në ndjekje të tij. Për të humbur gjurmët, ai është përgjigjur me armë dhe kjo bëri që operacioni të ndërpritej. Më pas janë mbledhur pamjet filmike në zonë dhe është bërë i mundur identifikimi i autorit, Klerent Bozhanaj, i cili nuk rezulton me precedent të mëparshëm penal. Ai ka qenë emigrant në Itali dhe është kthyer muajin e kaluar në Tiranë. Bozhanaj është arrestuar një ditë më parë ndërsa po futej në shtëpinë e tij. Efektivi iu nënshtrua një ndërhyrje mjekësore pasi plumbi në zonë e barkut i kishte prekur disa organe, ndërsa e ka kaluar rrezikun për jetën. Familjarët e autorit kanë treguar se kohët e fundit ai ka paraqitur shenja depresioni, por nuk ka marrë ndihmë mjekësore për problemet që ka shfaqur.