Izraeli bombardoi këtë të mërkurë selinë e ushtrisë siriane në Damask dhe zonën përreth Pallatit Presidencial, pasi paralajmëroi qeverinë e udhëhequr nga islamistët që ta linte pakicën druzhe të qetë në zemër të Sweidës, ku përleshjet sektare kanë vrarë gati 250 persona. Nga pamjet e publikuara, shihen retë e mëdha të tymit që mbuluan qendrën e Damaskut pas sulmit izraelit, që vrau të paktën 3 persona dhe plagosi 34 të tjerë. Forcat qeveritare siriane hynë të martën në qytetin Sweida, me shumicë druzhe, për të mbikëqyrur një armëpushim të rënë dakord me udhëheqësit e komunitetit druzhe, pas përleshjeve me fiset lokale beduinë, që lanë më shumë se 100 të vdekur. Megjithatë, dëshmitarët raportuan se forcat qeveritare u bashkuan me beduinët në sulmin ndaj luftëtarëve druzhë dhe civilëve në një tërbim të përgjakshëm nëpër qytet. Autoritetet e udhëhequra nga islamistët kanë pasur marrëdhënie të tensionuara me pakicat fetare dhe etnike të Sirisë që kur rrëzuan nga pushteti udhëheqësin e hershëm Bashar al-Assad në dhjetor. Ministri izraelit i Mbrojtjes, Israel Katz, i bëri thirrje Damaskut që t’i “lërë të qetë druzhët në Sweida”. “Siç e kemi bërë të qartë dhe paralajmëruar, Izraeli nuk do t’i braktisë druzhët në Siri dhe do të zbatojë politikën e demilitarizimit për të cilën kemi vendosur“, tha ai në një deklaratë. Forcat siriane duhet të tërhiqen, shtoi ai, dhe premtoi se nuk do të ndalen sulmet ushtarake izraelite derisa kjo të ndodhë. Kryeministri izraelit Benjamin Netanyahu tha në shkurt se Siria jugore duhet të çmilitarizohet plotësisht, duke paralajmëruar se Izraeli nuk do të pranonte praninë e forcave të qeverisë së udhëhequr nga islamistët pranë territorit që kontrollon.