Drejtori i Përgjithshëm i Organizatës Botërore të Shëndetësisë (OBSH), Tedros Adhanom Ghebreyesus, ka përjetuar momente frike dhe paniku pasi ndodhej në aeroportin e Sanaa, Jemen në momentin e sulmeve izraelite. “Ndërsa ishim gati të hipnim në avion aeroporti u bombardua. Një nga anëtarët e ekuipazhit të avionit tonë u plagos. Të paktën dy persona u raportuan të vrarë në aeroport. Kulla e kontrollit të trafikut ajror dhe pista u dëmtuan.", tha Ghebreyesus. 3 persona kanë humbur jetën ndërsa 11 të tjerë kanë mbetur të plagosur nga sulmet izraelite në Jemen. Izraeli ka marrë përsipër aktin, duke thënë se sulmoi infrastrukturën e përdorur nga rebelët në aeroportin ndërkombëtar në Sanaa dhe portet e Hodeidaa, Al-Salifit dhe Ras Qantibit, si edhe disa termocentrale. Ndërsa kryeministri izraelit Benjamin Netanyahu gjatë një fjalimi u shpreh se "Rebelët Houthi gjithashtu do të mësojnë atë që mësuan Hamasi dhe Hezbollahu dhe regjimi i Asadit dhe të tjerët".