Gjykata e Korçës ka vleerësuar si të ligjshëm arrestimin në flagrancë dhe ka caktuar masën e sigurisë arrest në shtëpi për mjekun kirurg Nikolla Nunka, i akuzuar për ngacmim seksual ndaj një pacienteje 21-vjeçare. Gjatë seancës që zgjati rreth dy orë dhe u zhvillua me dyer të mbyllura, Prokuroria paraqiti provat që sipas saj implikojnë kirurgun 72 vjeçar dhe mbështesin dyshimin e arsyeshëm për kryerjen e veprës penale. Për shkak të moshës së të akuzuarit, organi i akuzës kërkoi vlerësimin e ligjshëm të arrestit në flagrancë por caktimin e masës arrest në shtëpi, kërkesë e cila u pranua nga gjykata. Ngjarja që tronditi opinionin publik në Korçë nisi tre ditë më parë, kur e reja iu drejtua policisë me një denoncim kundër kirurgut. Sipas dëshmisë së saj, ngacmimi kishte ndodhur brenda ambienteve të spitalit, ku ajo po merrte shërbim mjekësor. Menjëherë pas denoncimit, policia vuri në pranga mjekun e njohur. Pavarësisht dëshmive të mbledhura, mjeku Nikolla Nunka ka mbajtur një qëndrim mohues. Ai nuk ka pranuar asnjë nga akuzat e ngritura, si gjatë marrjes në pyetje nga grupi hetimor, ashtu edhe në sallën e gjyqit. Pas vendimit të sotëm mjeku Nunka do të qëndrojë në masën e sigurisë arrest shtëpie deri në përfundim të procesit gjyqësor ku edhe do të jepet vendimi për atë çka ndodhi brenda mureve të spitalit të Korçës.