Hetimi për vdekjen e Giorgos Mazonakis po merr një tjetër drejtim. Policia greke është përqendruar te provat dixhitale të sekuestruara, veçanërisht te një fotografi që Ioanna Gaka ka bërë në klinikë dhe më pas ia ka dërguar një marrësi ende të paidentifikuar. Ioanna Gaka është mjeke greke, e cila ndodhej në klinikën private në Athinë, ku Giorgos Mazonakis iu nënshtrua plazmaferezës dhe pësoi arrest kardiak. Sipas dëshmisë së saj, ajo ishte mjekja që i kishte propozuar Mazonakisit këtë trajtim. Në hetimin për vdekjen e Mazonakisit, Gaka dhe bashkëshorti i saj, mjeku Ilias Theodoropoulos, janë ndër personat kryesorë të çështjes. Të dy janë arrestuar dhe përballen me akuzë për vrasje me dashje të mundshme, sipas zhvillimeve më të fundit të hetimit. Sipas të dhënave të ekspertizës, Gaka kishte bërë dy fotografi dhe një video me Mazonakisin në ditën e incidentit. Të tre skedarët janë fshirë më vonë, përpara se ajo të paraqitej në Stacionin e Policisë për të dhënë deklaratën e saj. Njëra prej fotografive është realizuar në orën 14:43:36. Në të shihet Mazonakis i shtrirë në shtratin e klinikës, ndërsa pajisja mjekësore është në funksion. Ai mban veshur një bluzë të verdhë dhe është i mbuluar me një batanije. Por ajo që ka tërhequr vëmendjen e hetuesve nuk është vetëm përmbajtja e fotografisë. Në të dhënat e saj dixhitale janë gjetur edhe koordinatat gjeografike, të cilat përputhen me vendndodhjen e klinikës në Athinë. Më e rëndësishmja është se ekspertët kanë identifikuar edhe gjurmë të ndarjes së këtij skedari. Pra, fotografia duket se i është dërguar një personi tjetër, identiteti i të cilit ende nuk dihet. Sipas informacioneve të deritanishme, nuk ka prova që fotografia i është dërguar Ilias Theodoropoulos. Hetuesit presin që zbërthimi i të dhënave telefonike të tregojë se kush ishte marrësi, përmes cilit aplikacion u dërgua fotografia dhe nëse bashkë me të është përcjellë edhe ndonjë mesazh. Fotografia e dytë është realizuar në orën 14:45:22, vetëm pak minuta pas së parës. Edhe kjo fotografi është fshirë dhe përmban të njëjtat koordinata që tregojnë vendndodhjen e klinikës. Në të njëjtën pajisje është gjetur edhe një video e fshirë. Ajo është krijuar në orën 14:43:55, pra në intervalin mes dy fotografive, dhe është fshirë në të njëjtën kohë me fotografinë e dytë. Të gjitha këto të dhëna po shqyrtohen në mënyrë kronologjike nga hetuesit, pasi mund të ndihmojnë në rindërtimin e minutave kritike të asaj dite. Në fokus të autoriteteve janë edhe telefonat celularë të tre punonjësve të klinikës. Hetuesit po kërkojnë mesazhe, telefonata, fotografi, video dhe çdo komunikim tjetër që mund të ndihmojë në zbardhjen e ngjarjes. Me interes të veçantë janë komunikimet me dy mjekët gjatë orëve kritike, si dhe çdo material që mund të jetë shpërndarë pas incidentit. Këto të dhëna mund të krahasohen me informacionin e gjetur në telefonin e Ioanna Gakës dhe në kompjuterin e klinikës. Në të njëjtën kohë, hetuesit po shqyrtojnë edhe mundësinë që Mazonakisit t’i jetë administruar një substancë para ose gjatë plazmaferezës. Deri tani nuk është identifikuar një ilaç apo substancë specifike, ndërsa autoritetet presin rezultatet e analizave toksikologjike. Nëse konfirmohet përdorimi i një substance të tillë, hetuesit do të duhet të përcaktojnë se si dhe nga kush është administruar ajo dhe nëse procedura është kryer në kushtet e kërkuara mjekësore. Në këtë fazë, fotografia e dërguar te një marrës i panjohur dhe të dhënat që mund të rikuperohen prej telefonit konsiderohen ndër elementet më të rëndësishme për të rindërtuar atë që ka ndodhur në klinikë në minutat para dhe gjatë incidentit.