Agjencia Qendrore e Inteligjencës është një nga agjencitë më të njohura të inteligjencës në botë, duke luajtur një rol vendimtar në sigurinë kombëtare dhe politikën e jashtme të Shteteve të Bashkuara. Shpesh veprimtaria e saj mbulohet me fshehtësi, duke u shndërruar në subjekt i filmave, librave dhe teorive të panumërta konspirative. Në një artikull, Wonderpolis liston tri funksione kryesore të CIA-s, që është themeluar në 1947. CIA mbledh informacione për një gamë të gjerë çështjesh që ndikojnë në sigurinë kombëtare. Kjo përfshin mbledhjen e informacionit mbi qeveritë e huaja, terrorizmin, trafikun e narkotikëve dhe çështje të tjera globale. Agjencia përdor metoda të ndryshme për mbledhjen e inteligjencës, duke përfshirë rekrutimin e spiunëve ose informatorëve jashtë vendit, përgjimet e komunikimeve, përdorimin e satelitëve dhe avionëve zbulues për të kapur imazhe me rëndësi të mundshme strategjike. Shpesh përdor edhe burimet publike, të tilla si media, punime akademike ose të dhëna publike. Mbledhja e inteligjencës është vetëm një pjesë e misionit. CIA ka një rol të rëndësishëm në analizimin e këtij informacioni për të prodhuar vlerësime gjithëpërfshirëse. Analistët vlerësojnë besueshmërinë e informacionit, e lidhin atë me njohuritë ekzistuese dhe vlerësojnë rëndësinë e tij. Ata përgatisin raporte që mund të variojnë nga informimet ditore deri te studimet e hollësishme mbi tendencat afatgjata. Këto raporte i shpërndahen Presidentit, zyrtarëve të lartë të SHBA-së dhe aktorëve kryesorë të sigurisë kombëtare dhe mbrojtjes. CIA gjithashtu kryen operacione të fshehta nën drejtimin e Presidentit. Këto janë aktivitete sekrete të krijuara për të ndikuar në punët e jashtme pa qenë e dukshme apo e njohur publikisht përfshirja e qeverisë së SHBA. Operacionet e fshehta mund të përfshijnë ndikimin e kushteve politike, ekonomike ose ushtarake jashtë vendit dhe mund të variojnë nga fushatat propagandistike deri tek mbështetja për grupet rebele ose ndërhyrjet klandestine në qeveritë e huaja.