Një 65-vjeçar nga fshati Gziq i Mirditës është arrestuar në flagrancë, pasi dyshohet se ka ndezur qëllimisht disa vatra zjarri. Policia e Mirditës finalizoi operacionin e koduar “Piromani”, pas një pune gjurmuese tre ditore. Në momentin e ndërhyrjes, Pashk Marku sapo kishte ndezur tre vatra zjarri në fshatin Gziq, të cilat përfshinë nga flakët një sipërfaqe pyjore. Zjarret u vunë nën kontroll nga shërbimet zjarrfikëse, në bashkëpunim me policinë. Sipas policisë, nga veprimet hetimore dyshohet se 65-vjeçari mund të jetë autor edhe i disa zjarrvënieve të tjera të regjistruara në territorin e Bashkisë Mirditë. Pashk Marku u arrestua për veprat penale “Shkatërrimi i pronës me zjarr” dhe “Shkatërrimi me zjarr i pyjeve dhe i mjedisit pyjor”. Nën drejtimin e Prokurorisë, vijojnë hetimet për dokumentimin e plotë të rasteve të tjera të zjarrvënieve për të cilat 65-vjeçari dyshohet si autor.