Seanca maratonë e së enjtes u mbyll me dakordësinë mes Partisë Socialiste dhe asaj Demokratike, të cilat bashkuan votat dhe miratuan 6 ndryshimet në rregulloren e Kuvendit. Nga 102 deputetë të pranishëm në sallë, 100 votuan pro, duke iu hapur rrugë ndryshimeve në rregullore. Kundër doli vetëm deputeti Redi Muçi i lëvizjes “Bashkë”. Projektligjet e tjera të rendit të ditës, përfshirë dhe projektin “Porta e Alpeve” u miratuan vetëm me votat e mazhorancës. Ndonëse gjetën gjuhën e përbashkët për rregulloren e Kuvendit, nuk munguan debatet mes socialistit Taulant Balla dhe demokratit Gazment Bardhi. Socialistët e tërhoqën propozimin që çdo projektligj i kërkuar nga Bashkimi Evropian të shqyrtohej brenda një jave me procedurë të përshpejtuar. Në dakordësinë e arritur parashikohet se ligjet e integrimit të kalojnë në Kuvend me procedurë normale, përveç rasteve kur kërkohet nga qeveria me kërkesë të arsyetuar. Gjithashtu, palët ranë dakord që institucionet e pavarura të vijojnë të raportojnë në komisione parlamentare, të cilat hartojnë një projektrezolutë, e cila më pas i kalon Komisionit “Xhafaj”. PS u tërhoq nga përgjysmimi i kohës së diskutimit në seancë plenare në pesë minuta dhe koha e diskutimeve do të vijojë 10 minuta. Ndryshimet parashikojnë kontrollin parlamentar përmes ndërhyrjes së Kryetarit të Kuvendit, në rastet kur institucionet nuk u përgjigjen kërkesave të deputetëve për informacion. Një tjetër ndryshim lidhet me kohëzgjatjen e seancave plenare. Me kërkesë të një kryetari grupi parlamentar, seanca plenare të ndërpritet në orën 22:00 dhe të rifillojë ditën pasardhëse. Po ashtu, u pranua dhe kërkesa tjetër e opozitës që masat disiplinore të pezullohen automatikisht, nëse ankimohen në Byronë e Kuvendit.