Në panelin dedikuar shëndetësisë në kuadër të Samitit të 4-t të Diasporës zhvilluar në Tiranë, Ministrja e Shëndetësisë dhe Mirëqenies Sociale, Evis Sala, theksoi rolin kyç të diasporës shqiptare në avancimin e sistemit shëndetësor në vend dhe ndërtimin e një modeli modern e të qëndrueshëm. Në fjalën e saj, Ministrja ndau edhe një rrëfim personal mbi rrugëtimin akademik dhe profesional jashtë vendit, duke e konsideruar rikthimin në Shqipëri si një angazhim për t’i kthyer vendit kontributin e marrë ndër vite. “Ky është një besim se së bashku mund të lëmë gjurmë të qëndrueshme në zhvillimin e mjekësisë dhe shërbimeve shëndetësore në Shqipëri”, u shpreh ajo. Duke vlerësuar diasporën si një nga asetet më të rëndësishme kombëtare, ministrja Sala theksoi se ajo nuk duhet të mbetet vetëm potencial, por të shndërrohet në një partner aktiv në zhvillimin e vendit. Ajo solli në vëmendje disa nga kontributet konkrete të profesionistëve shqiptarë jashtë vendit në fusha si onkologjia, radioterapia, inteligjenca artificiale dhe politikat e financimit të shëndetësisë. Në këtë kontekst, Ministrja paraqiti katër shtyllat kryesore të bashkëpunimit me diasporën: Transferimi i qëndrueshëm i dijes dhe ekspertizës; Ndërtimi i urave institucionale me qendra të rëndësishme europiane; Hartimi i politikave lehtësuese për përfshirjen e profesionistëve nga diaspora; Rritja e standardeve përmes inovacionit dhe kërkimit shkencor. Ajo bëri të ditur se janë në proces konkretizimi marrëveshje bashkëpunimi me institucione prestigjioze europiane, përfshirë partneritete me institute shëndetësore në Itali, duke synuar forcimin e kapaciteteve vendase dhe shkëmbimin e ekspertizës. Në përmbyllje, Ministrja Sala theksoi se reforma në shëndetësi kërkon një përpjekje të përbashkët dhe i bëri thirrje të gjithë profesionistëve shqiptarë, brenda dhe jashtë vendit, të kontribuojnë aktivisht në këtë proces.