Ministri i jashtëm rus Sergei Lavrov takoi sot në Afrikën e Jugut homologen Naledi Pandor, teksa vlerësoi qëndrimin dhe vlerat ‘e balancuara’ të Pretorias për konfliktin në Ukrainë. Ministrja Pandor tha nga ana e saj: "Ne jemi të ndërgjegjshëm se konfliktet kudo ku zhvillohen kanë pasoja negative për vendet në zhvillim, veçanërisht në kontinentin afrikan. Prandaj Afrika e Jugut përsërit se kërkon zgjidhje paqësore të konfliktit”. Ndërsa Lavrov tha mes të tjerash se konflikti në Ukrainë nuk mund të përkufizohet më si një “luftë hibride”, duke dënuar Perëndimin për dërgimin e miliarda dollarëve në armë e pajisje në mbështetje të Kievit. Duke përshkallëzuar retorikën e vendit të tij, Lavrov tha se konflikti është tashmë një luftë thuajse konvencionale me Perëndimin. Ai shtoi se Moska ishte e gatshme të negocionte me Ukrainën në muajt e parë të konfliktit por SHBA dhe kombe të tjera e këshilluan Kievin të vepronte ndryshe.