Në zonën e Abazës në Krujë, ministri i Mbrotjes Ermal Nufi, së bashku me ministrin e brendshëm Besfort Lamallari, Drejtorin e AKMC-së dhe Drejtorin e Përgjithshëm të Zjarrfikësve, po ndjekin nga afër situatën e zjarrit, i cili dyshohet se është shkaktuar nga dora e njeriut. Që prej pasdites, po punohet intensivisht për izolimin e flakëve, me mbështetje nga ajri të tre helikopterëve të Forcës Ajrore, në bashkëpunim me forcat operacionale të strukturave vendore. Ministri Nufi dhe Besfort Lamallari kanë vlerësuar punën e pilotëve të Forcës Ajrore dhe efektivëve të MZSH-së së Krujës, Kamzës, Tiranës dhe Vorës, të cilët po punojnë pa ndërprerje për izolimin e vatrës dhe mbrojtjen e banesave të rrezikuara. Për shkak të terrenit të thepisur dhe vështirësisë së ndërhyrjes nga toka, operacioni po zhvillohet në mënyrë të koordinuar nga toka dhe ajri, me synim vënien sa më shpejt nën kontroll të zjarrit.