Gjermania reagoi ashpër ndaj një videoje të krijuar me inteligjencë artificiale nga ministri izraelit i Sigurisë Kombëtare, Itamar Ben-Gvir, në të cilën paraqiten të burgosur palestinezë duke kaluar nëpër një shirit transportues. Pamjet u dënuan me forcë në Berlin, teksa kritikët i krahasuan me skena të kampeve naziste të përqendrimit. Zëdhënësi i Ministrisë së Jashtme gjermane, Martin Giese, pohoi se e kishte parë videon në fjalë. “Me sa di unë, ajo tani është fshirë, videoja ndërkohë është fshirë, por kjo nuk e bën më pak të tmerrshme. Një gjë e tillë është plotësisht e papranueshme”, deklaroi Giese. Zëdhënësu nënvuizoi se Gjermania “e kundërshton qartë” politikën dhe mënyrën e shprehjes së Itamar Ben-Gvir, duke shtuar se qëndrimi i Berlinit zyrtar për këtë çështje është “plotësisht i qartë”. Ben-Gvir ka fshirë nga profilet e tij në rrjetet sociale dy video që shkaktuan reagime të forta për mënyrën se si paraqiteshin të burgosurit palestinezë. Në njërën prej tyre, të publikuar të dielën e kaluar, shfaqeshin të burgosur palestinezë mbipeshë në një sallë gjyqi. Mbi kokat e tyre shfaqen flluska grafike që sugjerojnë se ata mendojnë për arsimimin, ushqimin apo nargjilen. Më pas, shihej një version i animuar i Ben-Gvir që shponte këto flluska dhe shtypte një buton të kuq, duke aktivizuar një shirit transportues që i dërgon të burgosurit përmes një dere. Pas kalimit nëpër derë, të njëjtët persona dukeshin të uritur, duke qarë dhe me kokën të ulur, cka solli kritika të ashpra.