Zëvendëskryetari i parë i Qeverisë dhe ministri i Sistemit Politik në Qeverinë e Maqedonisë së Veriut, Artan Grubi është i pari që ka doërzuar dorëheqjen e kushtëzuar tek kryeministri Dimitar Kovaçevski. “Duke qenë i vetëdijshëm për rëndësinë e integrimit dhe ardhmërinë dinjitoze të Republikës së Maqedonisë së Veriut, po ua dorëzoj, i nderuar kryetar i Qeverisë, dorëheqjen time nga pozita e zëvendëskryetarit të parë të Qeverisë dhe ministrit të Sistemit Politik dhe Marrëdhënie ndërmjet bashkësive, të cilën ju lutem që ta aktivizoni në momentin kur opozita do t’i votojë dhe do të hyjnë në fuqi ndryshimet e propozuara kushtetuese në Kuvend”, thuhet në aktin e dorëheqjes së Grubit. BDI-ja gjatë fundjavës mori vendim që ministrat e saj të dorëhiqeshin nga ekzekutivi me qëllim të “plotësimit të kushtit të partisë maqedonase në opozitë VMRO-DPMNE-së për votimin e ndryshimeve kushtetuese dhe formimin e një ekzekutivi të ri” pa BDI-në.