Shqipëria për të hyrë në Europë bëri një ligj që, nëse je i dënuar në Greqi, nuk mund te kandidosh as për në Parlament e as për zgjedhje vendore. Ndërsa Kryeministri grek Micotaqis, për një grusht votash më shumë nga ekstremistët grekë në zgjedhjet Europiane, futi në listat për eurodeputet Fredi Belerin, një i dënuar në shkallë të parë për korrupsion në Shqipëri. Ai ka edhe një dënim në Greqi për armëmbajtje pa leje të kryer në bashkëpunim, ndërkohë që në Shqipëri është marrë i pandehur për akte terroriste, në masakrën e Peshkëpisë në 18 mars 1995 ku mbetën të vrarë dy ushtarë shqiptarë. Partia e Kryeministrit grek, Kyriakos Mitsotakis zyrtarizoi Fredi Belerin, si një nga 42 kandidatët në zgjedhjet e Parlamentit Europian që do të mbahen nga data 6 deri në 9 qershor 2024. Kandidimi i Belerit ishte paralajmëruar kohë më parë dhe mediat e Athinës e kishin bërë thuajse zyrtare mbështetjen e kryeministrit grek për Belerin, pavarësisht faktit se dy prej bashkëpunëtorëve më të ngushtë të kreut të mazhorancës në Greqi, ministri i jashtëm dhe një prej këshilltareve për politikën e jashtme kishin dalë kundër. Teksa ka marrë emërimin për të kandiduar nën siglën e “Demokracisë së Re” në Athinë, Fredi Beleri në Tiranë është dënuar me 2 vjet burg nga Gjykata e Posaçme për Korrupsionin dhe Krimin e Organizuar e cila e gjeti fajtor për korrupsion aktiv në zgjedhje kryetarin e zgjedhur të Bashkisë së Himarës. Të gjitha shkallët e gjyqësorit në vend, përfshi këtu edhe Gjykatën Kushtetuese pak ditë më parë, nuk kanë marrë asnjë vendim në favor të Fredi Belerit. Pamjet: AFP