Metodat e luftës së Izraelit në Gazë konsistojë me karakteristikat e gjenocidit, tha një komitet i posaçëm i Kombeve të Bashkuara, duke e akuzuar Izraelin se po përdor “urinë si metodë lufte”. Komiteti i posaçëm i Kombeve të Bashkuara vuri në pah “numrin e madh të viktimave në mesin e civilëve dhe kushtet e rrezikshme për jetë të imponuara qëllimisht ndaj palestinezëve” në raportin e ri që mbulon periudhën që nga nisja e luftës më 7 tetor 2023, deri në korrik të këtij viti. Praktikat e luftës të Izraelit në Gazës “përkojnë me karakteristikat e gjenocidit”, tha Komiteti, i cili për dekada të tëra ka hetuar praktikat izraelite që prekin të drejtat e njeriut në territoret palestineze. Izraeli, tha Komiteti, “po përdor urinë si metodë të luftës dhe po shkakton ndëshkim kolektiv ndaj popullsisë palestineze”. Gjatë fundjavës që shkoi, OKB-ja tha se uria ka kapluar veriun e Gazës. Në raportin e publikuar më 14 nëntor është dokumentuar se si fushata ajrore e Izraelit në Gazë ka shkatërruar shërbimet thelbësore dhe ka shkaktuar katastrofë mjedisore që do të ketë pasoja afatgjata në shëndet. Deri në shkurtin e këtij viti, forcat izraelite kishin përdorur më shumë se 25.000 tonë mjete shpërthyese në mbarë Rripin e Gazës, sasi që është e barasvlershme “me dy bomba bërthamore”, thuhet në raport. Komiteti tha po ashtu se është i shqetësuar nga “shkatërrimi i paprecedent i infrastrukturës civile dhe numri i lartë i viktimave në Gazë”. Numri i lartë i viktimave, sipas Komitetit, ka ngritur shqetësime lidhur me përdorimin e inteligjencës artificiale nga Izraeli për të avancuar sistemet e tij të shënjestrimit gjatë operacioneve ushtarake.