Gjykata e Posaçme Antikorrupsion shpalli vendimin për biznesmenin Pëllumb Gjoka dhe për ish-kreun e Policisë së Beratit, Ardit Hasanbegaj, pjesë e dosjes ‘Metamorfoza’. GJKKO dënoi me 9 vite burg biznesmenin Gjoka, dënim që i ulet me 1/3 për shkak të gjykimit të shkurtuar. Për rrjedhojë, biznesmeni Pëllumb Gjoka do të vuajë 6 vite burg, dënim që do ta shlyejë në një burg të sigurisë së lartë. Pëllumb Gjoka është shpallur fajtor për sigurim kushtesh për të kryer vrasjen e shtetasve Kleanthi Musabelli, Dorjan Duli dhe Ibrahim Lici, si dhe për grup të strukturuar kriminal dhe korrupsion aktiv të funksionarëve të sistemit të drejtësisë, ndërkohë që u shpall i pafajshëm për armëmbajtje pa leje. Gjithashtu, biznesmeni po gjykohet në një tjetër dosje edhe për vrasjen e Gjin Ndojit. Po ashtu, Ardrit Hasanbegaj, ish-zyrtar i lartë i policisë, u dënua nga Gjykata e Posaçme me 7 vite e 4 muaj burg, ndërsa me aplikimin e gjykimit të shkurtuar dënimi përfundimtar u reduktua në 5 vite burg. Edhe Hasanbegaj u shpall fajtor për sigurimin e kushteve për të kryer vrasjen e Dorjan Duli dhe Ibrahim Lici dhe grup të strukturuar kriminal. Ai do ta vuajë dënimin në një burg të sigurisë së lartë, ndërsa i hiqet edhe e drejta për të ushtruar funksione publike.