Gjykata e Posaçme Antikorrupsion vendosi të lejë në fuqi masën “arrest në burg” për ish presidentin Ilir Meta. Avokati i Metës, Kujtim Cakrani renditi për gazetarët pas gjyqit arsyet se përse kreu i PL po mbahet në burg padrejtësisht. Në lidhje me dyshimet e SPAK se Ilir Meta dhe Monika Kryemadhi kanë përdorur një kartë bankare për blerje e shpenzime jashtë vendit të dhënë nga biznesmeni Ardian Shatku, avokati i Metës, Kujtim Cakrani tha se Meta nuk ka qenë në dijeni të asnjë shpenzimi të Kryemadhit me kartën. “Parashtruam arsyet se përse zoti Meta nuk duhet të qëndrojë në kushtet e paraburgimit. Foli vetë edhe zoti Meta për rreth një orë, i cili hodhi dritë mbi pretendimet e organit të procedurës, qoftë për një kartë krediti që dispononte ish bashkëshortja e tij dhe disa veprime të tjera të lobimit që nuk pasqyrohen me emër dhe mbiemër se kush i ka firmosur. Pasi pati një debat me prokurorin Kllapi, në fund gjykata vendosi vijimin e masës së sigurimit. Ne nuk është e se prisnim ndonjë ndryshim të masës, zoti Meta është i bindur se është në burg për arsye politike, një ish kryeministër, një ish president të qëndrojë në masa ekstreme siç është arresti me burg, ka kaluar çdo limit organi i procedurës, duke shkelur edhe Gjykatën Europiane të të Drejtave të Njeriut në rastin Gëllçi kundër Shqipërisë. Kartat janë përdorur të gjitha nga ish gruaja e zotit Meta, Meta nuk ka asnjë dijeni dhe nuk ka përdorur karta në jetën e tij dhe nuk ka asnjë lloj dijenie se çfarë ka ndodhur me zonjën Kryemadhi. Janë dy etnitete dhe secili mban përgjegjësi për veprimet e tij. Askush nuk e di të më japë një shpjegim juridik që të qëndrojë në masën ekstreme siç është arresti me burg”, tha avokati i Metës. I arrestuar në tetor të vitit të kaluar, Meta ndodhet në qeli dhe kërkon zëvendësim të masës së sigurisë nga arrest në burg në një masë tjetër më të lehtë.