Në Gjykatën e Posaçme Antikorrupsion u zhvillua të enjten seanca paraprake ndaj ish-presidentit të vendit, Ilir Meta, ku prokurorët e SPAK lexuan një pjesë të parashtrimeve të tyre, ndërsa seanca e radhës u caktua më 29 janar. Në seancë ishte i pranishëm edhe ish-presidenti, i cili ndodhet i paraburgosur në burgun 313, si edhe ish-bashkëshortja e tij, Monika Kryemadhi. Në një reagim në rrjetet sociale pas seancës, kreu i Partisë së Lirisë, Ilir Meta, dha detaje nga përballja me prokurorët. “Për 4 orë kemi dëgjuar prokurorët që lexonin akuzat e tyre për CEZ-DIA, që ishin siç ju a kanë shpërndarë më 21 tetor 2024. U detyruam të ndërhynim disa herë, jo për t'i ndërprerë prokurorët, por për t'i ndihmuar të mos gënjejnë para gjykatës. Ilir Meta, as i është shmangur drejtësisë, as nuk bëj lojra për shtyrje seancash”. Avokati i Metës, Kujtim Cakrani, u shpreh se në seancën e radhës do të paraqesin kërkesat në lidhje me akuzat që rëndojnë ndaj ish-presidentit.